Fyrsta skrefið í átt að breyttu KR-svæði

Borgarráð hefur samþykkt verklýsingu vegna breytinga á aðalskipulagi Reykjavíkur fyrir KR-svæðið í Vesturbæ Reykjavíkur.

Þar með er tekið fyrsta skrefið að uppbyggingu á svæðinu við Frostaskjól í samræmi við viljayfirlýsingu borgarinnar og KR frá nóvember 2017.

Frekari uppbygging á íþrótta- og tómstundastarfi KR stendur fyrir dyrum á svæði félagsins. Frumkvæðið kemur frá KR en stjórnendur þess telja að tími sé kominn til að hefja uppbyggingu þar. KR eignaðist landið árið 1939. Frumteikningar af mögulegri uppbyggingu hafa þegar verið kynntar og ræddar á íbúafundum í hverfinu, að því er fram kemur í umfjöllun um mál þetta í Morgunblaðinu í dag.