„Til þess að tryggja nærveru manna á meðan meðferð framsalsmála á hendur þeim stendur hefur reglan verið sú að þeir sæti farbanni,“ segir í skriflegu svari embættis ríkissaksóknara við fyrirspurn mbl.is, en tilefni fyrirspurnarinnar var úrskurður Landsréttar frá því í fyrradag, þar sem því var hafnað að pólskur ríkisborgari sem yfirvöld í heimalandi hans vilja fá framseld yrði áfram í farbanni hérlendis.
„Séu menn ekki í farbanni eða gæsluvarðhaldi er auðvitað sú hætta fyrir hendi að þeir geti farið úr landi áður en framsalmálið er til lykta leitt,“ segir ennfremur í svari embættisins, en ríkissaksóknari fór fram á að maðurinn yrði áfram í farbanni, þar sem ætla mætti að hann reyndi að komast úr landi, leynast eða koma sér með öðrum hætti undan málsókn sem bíði hans í Póllandi.
Maðurinn er eftirlýstur þar í landi fyrir brot sem geta varðað allt að 12 ára fangelsi samkvæmt pólskum lögum, grunaður um vörslu, sölu og dreifingu á nokkru magni af fíkniefnum, þar á meðal einu kílói af kannabisefnum og talsverðu magni af amfetamíni.
Rúmir sjö mánuðir eru síðan framsalsbeiðni barst frá pólskum yfirvöldum og samkvæmt svörum frá bæði dómsmálaráðuneytinu og embætti ríkissaksóknara getur afgreiðsla framsalsbeiðna tekið allt frá nokkrum mánuðum og upp í rúmt ár, en málsmeðferðartíminn fer eftir eðli og umfangi mála.
Dómstólarnir sögðu ekki unnt að láta manninn sæta áframhaldandi farbanni þar sem dómsmálaráðuneytið hefði ekkert lagt fram „um rannsókn ráðuneytisins eða frekari meðferð þess á framsalsbeiðni varnaraðila“ frá því að ríkissaksóknari lauk rannsókn sinni þann 3. janúar síðastliðinn og skilaði öllum gögnum til ráðuneytisins.
„Mál þetta hefur ekki tekið óvenju langan tíma,“ segir í svari dómsmálaráðuneytisins við fyrirspurn mbl.is.
Embætti ríkissaksóknara tekur ekki afstöðu til niðurstöðu dómstólanna í þessu máli að öðru leyti en því að þetta sýni „mikilvægi þess að passa upp á málsmeðferðartímann“.
Samkvæmt svari dómsmálaráðuneytisins við fyrirspurn blaðamanns má gróflega áætla að um 5-15 einstaklingar hafi verið framseldir til erlendra ríkja á hverju ári síðastliðin tíu ár, en nákvæmar upplýsingar um það liggja ekki fyrir.
Sömuleiðis liggur ekki fyrir að svo stöddu hversu margir einstaklingar eru í framsalsferli á þessu augnabliki, en gróflega má áætla að nú séu til meðferðar 7-10 mál, samkvæmt ráðuneytinu.