Samtals 738 einstaklingar leituðu sér aðstoðar á sjúkrahúsum og heilsugæslum hér á landi á fimm ára tímabili frá 2013 til 2017 vegna áverka eftir hund. Að meðaltali gera það 147 skipti á ári. Fæst voru þau árið 2015 eða 123 talsins, en flest árið 2014 þegar tilvikin voru 163. Þetta kemur fram í svari heilbrigðisráðherra við fyrirspurn Björns Levís Gunnarssonar.
Flest málin komu á borð heilbrigðisstofnana á höfuðborgarsvæðinu, en samtals var um að ræða 192 atvik hjá heilsugæslum höfuðborgarsvæðisins og 71 hjá Landspítalanum. Hjá Heilbrigðisstofnun Suðurnesja komu upp 144 mál og 121 mál kom upp hjá Heilbrigðisstofnun Suðurlands á tímabilinu. Ekki fengust tölur frá Heilbrigðisstofnun Norðurlands og gæti heildartalan því verið nokkuð hærri.
Fram kemur í svari ráðherra að flestir sem leiti sér aðstoðar vegna áverka eftir hund á Landspítalanum flokkist í tvö lægstu alvarleikaskorin af sjö, þ.e. „enginn“ og „lítill“.
Á tímabilinu voru sjö sem fengu áverkaflokkinn „meðalalvarleiki“ en dæmi um áverka í þeim flokki eru tognun, ristarbrot og handleggsbrot.