Almennt séð er búist við sólarlitlu en hlýju veðri á landinu um verslunarmannahelgina.
Að sögn Þorsteins V. Jónssonar, veðurfræðings hjá Veðurstofu Íslands, er spáð suðvestanátt og skúrum víða um land á morgun og dembur geta komið síðdegis.
Á föstudaginn er spáð rigningu sunnan- og vestanlands og bætir í þegar líður á kvöldið en ekki verður hvasst í veðri. Úrkomuminna verður norðaustan til og ágætishlýindi þar en þar má reikna með síðdegisskúrum.
Laugardagurinn verður góður í flestum landshlutum. Hitinn verður á bilinu 15 til 18 stig sunnan- og vestanlands.
Á sunnudeginum fer hitinn upp í 20 stig fyrir norðan og þar verður heitt og þurrt. Sama dag kemur lægð í heimsókn til landsins. Hvessa fer af austri síðdegis og rigning verður sunnan til.
Á frídegi verslunarmanna verður kominn austan strekkingsvindur víða og bleyta í flestum landshlutum. Minnsta vætan verður á Vesturlandi en mest fyrir austan. Hlýindi verða áfram á landinu.
„Það næðir svolítið um þjóðhátíðargestina síðustu daga hátíðarinnar,“ segir Þorsteinn og bætir við að veðrið um helgina verði breytilegt en hlýtt.