Vegagerðin varar við sandfoki á Skeiðarársandi í dag. Vegfarendum um Suðausturland er bent á að vind mun markvert lægja á leiðinni frá Kvískerjum og austur fyrir Höfn upp úr klukkan 14 eða 15. En um svipað leyti hvessir af norðaustri og í Skaftafelli og við Svínafell verða hviður allt að 35 m/s. Mun þetta vara í um 2-3 klukkustundir og með fylgir sandfok á Skeiðarársandi.
Norðanáttir verða ríkjandi næstu daga og spáð er hvassviðri eða stormi undir Vatnajökli fram á kvöld. Annars verður heldur hægari vindur. Rigna mun talsvert fyrir norðan og austan í dag, jafnvel má búast við úrhelli á Austurlandi og norðanverðum Austfjörðum fram á nótt. Fremur svalt verður í veðri á norðanverðu landinu en mun hlýrra syðra, segir í hugleiðingum veðurfræðings Veðurstofunnar nú í morgun.
Gular viðvaranir eru í gildi vegna snarpra vindhviða og vatnavaxta á austanverðu landinu og „eru ferðalangar hvattir til að kanna þær áður en lagt er í'ann,“ skrifar veðurfræðingurinn. Samkvæmt viðvörunarorðum á vef Veðurstofunnar gekk í norðan 15-23 m/s í nótt með vindhviðum 30-35 m/s, einkum austan Öræfa. Varasamt ferðaveður er fyrir ökutæki sem eru viðkvæm fyrir vindi. Einnig er útlit fyrir talsverða eða mikla rigningu á Austurlandi og á norðanverðum Austfjörðum og því má búast við vatnavöxtum þar.