Greiddu 1,4 milljónir vegna utanvegaaksturs

Við Grafarlönd á Öskjuleið.
Við Grafarlönd á Öskjuleið. Ljósmynd/Lögreglan

Hópur erlendra ferðamanna, sem gerðist sekur um utanvegaakstur við Jökulsárlón á Breiðamerkursandi á sunnudag og í friðlandinu við Grafarlönd á Öskjuleið á mánudag, greiddi samtals 1,4 milljónir í sekt í dag.

Þetta kemur fram á Facebook-síðu lögreglunnar á Norðurlandi eystra. Þar segir að embættið hafi lokið rannsókn er varðar utanvegaakstur hóps 25 erlendra ferðamanna á sjö breyttum jeppabifreiðum.

Ekki var þó öllum ökutækjunum sjö ekið utan vega í þessum tilvikum, en hópurinn hafði þó verið að ferðast saman sem ein heild og tjón á landi af völdum fjögurra bifreiða staðfest.

Töluverðar skemmdir voru unnar á landi við vesturströnd Jökulsárlóns og gríðarlegt tjón á landi í Grafarlöndum norðan Herðubreiðar.

Við rannsókn málsins kom fram hjá aðilum máls, að um kunnáttuleysi og vanþekkingu hefði verið að ræða og var beðist afsökunar vegna þess tjóns sem unnið var.

Viðkomandi ferðamenn óskuðu þess jafnframt að fá að aðstoða við lagfæringar þess lands sem varð fyrir tjóni, en var það mat landvarða að betra væri að fá til verksins sértækan búnað og fólk.

mbl.is