Ástfangnir fengu lása á Ástarviku

Árleg Ástarvika – kærleiksrík menningarvika – er hafin í Bolungarvík. Setningin var á varnargarðinum Verði fyrir ofan Bolungarvík.

Þar var kveikt á rauðum blysum og ástfangin pör fengu ástarlása til að innsigla ást sína en hægt er að festa lásana við grindverkið á varnargarðinum. Þá faðmaðist fólk og kysstist af þessu tilefni, að því er fram kemur á vef Bolungarvíkur.

Hver ástarviðburðurinn rekur annan í vikunni. Tíu bestu ástarsögur allra tíma eru á dagskrá í bókasafninu alla daga klukkan 14. Á morgun verður ástarvikuganga í surtarbrandsnámuna í Syðridal. Ástarvikunni í Bolungarvík lýkur á laugardag.