Innlent | mbl | 25.9.2018 | 12:16

Ræddu ógnir á netinu

Netöryggisráð Íslands.

Þróun ógna á netinu og viðbrögð grannríkja þar að lútandi var meðal þess sem rætt var á fyrsta fundi nýskipaðs netöryggisráðs en alls sitja 25 aðal- og varafulltrúar í ráðinu.

Fyrsti fundur ráðsins var haldinn fyrir rúmri viku. Hlutverk netöryggisráðs er að vera samstarfsvettvangur stjórnvalda um málefni er snerta net- og upplýsingaöryggi, að fylgja eftir innleiðingu á stefnu stjórnvalda á hverjum tíma og að vera vettvangur miðlunar upplýsinga og samhæfingar aðgerða á sviði net- og upplýsingaöryggis, samkvæmt fréttatilkynningu.

Á fyrsta fundi ráðsins voru ýmis mál tekin fyrir sem munu jafnframt verða til frekari umfjöllunar á komandi vikum og mánuðum:

Þróun ógna á netinu og viðbrögð grannríkja þar að lútandi.
Drög að frumvarpi til laga um öryggi net- og upplýsingakerfa mikilvægra innviða (sem er þáttur í innleiðingu hinnar svokölluðu NIS-tilskipunar).
Mótun nýrrar stefnu um netöryggismál.
Eftirfylgni við úttekt Oxford-háskóla á stöðu netöryggis hérlendis.
Árangur af starfi netöryggissveitarinnar á árinu í kjölfar samnings sem gerður var á milli Stjórnarráðsins og Póst- og fjarskiptastofnunar um netöryggisþjónustu.
Nauðsyn þess að atvik séu tilkynnt til netöryggissveitarinnar.
Efling fræðslu og kennslu í netöryggisfræðum (þar á meðal námskeið sem fyrirlesari frá Oxford hélt fyrir háskólanema og sérfræðinga, samsvarandi námskeið er fyrirhugað í janúar vegna mikillar eftirspurnar).
Áframhaldandi uppbygging tengsla við erlenda háskóla sem bjóða upp á framhaldsnám í netöryggisfræðum og miðlun upplýsinga til stúdenta um nám og mögulega styrki.
Breytt og aukið hlutverk evrópsku netöryggisstofnunarinnar ENISA og aukin þátttaka Íslands í starfi hennar.
Hugsanleg þátttaka Íslands í evrópsku netöryggiskeppninni (European Cyber Security Challenge).
Varnir mikilvægra innviða samfélagsins m.t.t. árása á netkerfi þeirra (beint eða óbeint).
Könnun á hversu háðir mikilvægir innviðir eru gervihnattabundinni þjónustu (t.d. vegna staðsetningar eða tímamerkja).
Netöryggisæfingar.
Dulritun samskipta á milli opinberra aðila.
Rannsóknir á greiningu á upplýsingaflæði á samfélagsmiðlum (án greiningar á efni) til að kanna hugsanlegt flæði upplýsinga frá eða í gegnum falskar uppsprettur.