Þrír karlmenn hafa játað að hafa kveikt í Laugalækjarskóla í byrjun mánaðarins. Lögreglan handtók mennina, sem eru á þrítugsaldri, eftir ábendingu sem henni barst fyrir um viku.
Samkvæmt upplýsingum frá Jóhanni Karl Þórissyni, aðstoðaryfirlögregluþjóni hjá lögreglunni á höfuðborgarsvæðinu, voru mennirnir með grillolíu og notuðu hana til að kveikja í laufblöðum og fleiru lauslegu við vegg skólans til þess að hlýja sér. Það fór hins vegar úr böndunum með þeim afleiðingum að eldurinn læsti sig í klæðningu á vegg skólabyggingarinnar. Grunur leikur á að mennirnir hafi verið í annarlegu ástandi.
Lögregla hefur lokið rannsókn á málinu og fer það nú til ákærusviðs lögreglunnar á höfuðborgarsvæðinu sem ákveður hvort ákæra verður gefin út á hendur mönnunum.