„Það hvessir smám saman í nótt og á morgun og er raunar að byrja að hvessa við suðvesturströndina og á Vestfjörðum,“ segir Óli Þór Árnason, veðurfræðingur á vakt á Veðurstofu Íslands. „Það bætir jafnt og þétt í vindinn. Svo kemur úrkoman með þegar líður á morguninn og eftir miðjan dag verður þetta orðið leiðindaveður býsna víða.“
Afar slæmu veðri er spáð næstu tvo daga og hefur Veðurstofan gefið út gula viðvörun fyrir stóran hluta landsins eftir hádegi á morgun. Viðvörunin gildir til miðnættis á fimmtudag og er spáð allt að 50 metrum á sekúndu í hviðum. Búast má við því að samgöngur raskist vegna roks og snjókomu og gæti innanlandsflug m.a. raskast. Eru ferðamenn því hvattir til að fylgjast vel með veðurspám og -viðvörunum.
Óli Þór segir að þótt leiðindaveður verði um land allt verði veðrinu engu að síður nokkuð misskipt. „Það verður t.d. mjög hvasst á Vestfjörðum, en ekki kannski endilega mjög mikil úrkoma,“ segir hann og kveður útlit fyrir skafrenning og frost á þeim slóðum. „Eftir því sem kemur austar með Norðurlandinu eykst hins vegar úrkoman en vindurinn minnkar.“
Hiti verður í kringum frostmark við ströndina, en vægt frost inn til landsins. Í 100-200 m hæð yfir sjávarmáli á Norðurlandi verður þá líklega snjókoma. „Það er ekki heppilegt hitastig t.d. varðandi ísingu á raflínum. Það skefur í þessu líka og þá er viðbúið að færð spillist.“
Á Austfjörðum verður líklega hvað mest úrkoman, en ekkert sérlega mikill vindur. Þar verður hins vegar líklega aðeins hlýrra.
„Svo þegar komið er á Suðausturland minnkar úrkoman en vindurinn eykst aftur á móti töluvert,“ segir Óli Þór og kveður langhvassast verða á þeim slóðum. „Þar má reikna með að meðalvindur nái upp í 25 m/s á vindasömustu stöðunum.“ Þetta geti til að mynda átt við á vissum svæðum í Öræfasveitinni sem geti orðið mjög snúin í norðaustanátt. „Þar má reikna með að hviður fari upp yfir 40 m/s og geti jafnvel farið upp undir 50 m/s ef vindurinn hittir þannig á.“
Á Faxaflóasvæðið verður eingöngu vindasamt og má þá búast við að vindstyrkurinn verði hvað mestur á sunnanverðu Snæfellsnesi, Hafnarfjalli og Kjalarnesi. „Þetta eru þessir þekktu staðir í norðaustanáttinni,“ segir Óli Þór. Þar megi reikna með yfir 20 m/s meðalvindi og hviðum sem verði tvöfalt öflugri.
Aðfaranótt föstudag fer loks að draga úr veðrinu, en þó verður enn nokkuð hvasst á föstudagsmorgun.