Orðin sem notuð eru til að gera konur tortryggilegar og draga úr trúverðugleika þeirra í stjórnmálum og heyrast í samtölum þingmanna Miðflokksins og Flokks fólksins á barnum Klaustri lýsa menningu hópsins. Þetta segir Oddný G. Harðardóttir, þingmaður Samfylkingar.
mbl.is ræddi við Oddnýu í hádeginu eftir fund hennar með Ingu Sæland, formanni Flokks fólksins, og Silju Dögg Gunnarsdóttur, þingmanns Framsóknarflokksins, vegna ummæla þingmanna Miðflokksins og Flokks fólksins á barnum Klaustri 20. nóvember þar sem m.a. farið var niðrandi orðum um þær.
Á fundinum heyrist í þeim Sigmundi Davíð Gunnlaugssyni, Gunnari Braga Sveinssyni, Bergþóri Ólasyni og Önnu Kolbrúnu Árnadóttur, þingmönnum Miðflokksins, ásamt þeim Karli Gauta Hjaltasyni og Ólafi Ísleifssyni, þingmönnum Flokks fólksins.
Oddný segist ekki ætla að tjá sig um það hvort hún geri kröfu um að einhverjir þingmannanna ættu að segja af sér vegna málsins. Það er eitthvað sem þeir þurfi að fara yfir sjálfir ásamt grasrótinni í sínum flokkum.