Að setjast niður og setja í hlutlausan

„Út frá samfélagslegum þrýstingi neyðast karlmenn ómeðvitað til að dvelja meira í höfðinu en hjartanu, og við ætlum á þessu námskeiði að draga fram hið ólógíska eðli hjartans og spila á strengina þarna á milli,“ segir Ólafur Stefánsson um Karlakakó sem hann mun leiða.

„Hugmynd mín með þessu námskeiði er að skoða með þátttakendum hvar karlmaðurinn er kröftugastur og bjartastur. Til dæmis værum við að skoða afann, spyrja okkur að því hvað það er í afanum sem við elskum. Afinn, þessi vitri maður sem er laus við allt vesen, hann er víðsýnn, tímalaus og slakur. Þessi afi sem hefur áttað sig á lífinu, ekki afinn sem hefur gefist upp og er reiður. Það er hægt að sækja margt í þessa orku hins aldna og vitra, en sem annað dæmi er líka hægt að sækja margt í kraftamikla orku hins viðkvæma unglingsstráks,“ segir Ólafur Stefánsson, fyrrverandi landsliðsmaður í handbolta, sem verður með námskeið fyrir karla sem hefst nú í janúar undir heitinu Karlakakó.

Óli segir námskeiðið skiptast í þrennt, fyrstu tveir tímarnir af sex fari í að spyrja sig: Ert það þú sem ert við stjórn í þínu lífi? Tekurðu ábyrgð á öllu eða ertu ennþá að láta fortíðina þyngja þig? Hvað er skilyrðing? Ertu staddur í einni slíkri og ef svo er, er til leið út úr því?

„Þá kemur að miðhluta námskeiðsins sem gengur út á að staldra við og kalla fram kannski sína eigin rödd sem legið hefur í dvala. Að hefja leitina að eigin rödd getur verið þjáningarfullt ferli hvort sem um karl eða konu er að ræða, og krefst vissulega hugrekkis. Ég nota oft líkinguna um golfleikara sem ætlar að skipta um sveiflu eða breyta um stíl, það er líklegt að hann verði lélegur í a.m.k. þrjú ár. Þessi vinna krefst síaukins sjálfstals óskasjálfsins og hins sjálfsins sem telur eða telur ekki að breytinga sé þörf. Fyndna þversögnin þarna er að bara sú staðreynd að þér finnist þú þurfa að breytast, er líklega það sem tefur þig mest í átt að sjálfssátt.

Og í síðustu tvö skiptin mun verða spurt: Þegar þú veist að sá sem þú vilt vera sem karlmaður, það fallegasta í karlmennskunni, er við stjórn og tekur ákvarðanir, þá er kannski vilji til að óska sér upp á nýtt.

Ég ætla að nota síðustu tvo tímana á námskeiðinu til að gera æfingar í að sjá sig fyrir sér í þeim aðstæðum sem viðkomandi vill vera í. Djúp sjálfsskoðun getur verið nokkuð háskaleg ferð og margir hafa týnst á leiðinni. Að finna óskasjálfið sitt er svolítið eins og að reyna að finna gullið á enda regnbogans. En það er auðvitað sá staður sem við ómeðvitað leitum öll að, því í því er falinn leyndardómurinn að veruleikanum sjálfum.“

Hin eilífa saga þjakaða pabba

Óli segir að leiðir í leitinni að óskasjálfinu geti verið margar og ólíkar, en á þessu tiltekna námskeiði hjá honum verði notast við hreint kakó frá indíánum.

„Það opnar hjarta fólks á mjúkan hátt. Oft er sagt að kaffið sé hausinn á okkur en hreint kakó sé hjartað. Það er gott fyrir alla að reyna að hafa jafnvægi þar á milli. Út frá samfélagslegum þrýstingi neyðast karlmenn ómeðvitað til að dvelja meira í höfðinu en hjartanu, og við ætlum á þessu námskeiði að draga fram hið ólógíska eðli hjartans og spila á strengina þarna á milli.“ Óli segist líka ætla að koma inn á það sem flestir karlar þekkja þegar þeir komast á fullorðinsár, hina miklu kröfu um að þeir keyri af stað af krafti og framkvæmi. „Það þarf að opna fyrir minni dómhörku á vinnustöðum gagnvart persónuleika hvers og eins karlmanns. Það er svo sterkt í okkur að halda að ef einhver fellur ekki alveg inn í fyrirframhugmyndir okkar um hvernig fólk á að haga sér í vinnunni, þá sé viðkomandi að standa sig illa. Mér tókst að halda því að fá að vera svolítið skrýtinn í minni vinnu í 20 ár, til dæmis að gera það sem ég vildi gera við minn frítíma án þess að það bitnaði á vinnuframlagi mínu. Það er svo djúpt í okkur að efast um praktíska hæfni þeirra sem gera hlutina aðeins „öðruvísi“. En þetta er að lagast, stjórnendur fyrirtækja eru orðnir meðvitaðir um að fjölbreytileiki í röðum starfsmanna er kostur. Skrýtni gaurinn er alveg jafn verðmætur og hinir sem falla meira að viðteknum hugmyndum. Karlmenn þurfa að þora að vera þeir sjálfir, en nota bene, fyrst þurfa þeir að vita hver „þessi sjálfur“ er. Öll þessi vaxandi spenna í vinnu karlmanna sem skapast af pressunni að standa sig, á það til að blása út inni á heimilinu og er hin eilífa saga hins þjakaða pabba sem ber í sér hörku forfeðra sinna, sem líka þurftu að standa undir einhverri tegund af karlmennsku á tímum þar sem lífið var í alvöru saltfiskur. Sjáðu langafa þinn fyrir þér í kundalini. Leiðin út úr þessum „syndum feðranna“, sem í raun voru kannski aldrei syndir, er fyrir karlmanninn að setjast niður, setja í hlutlausan, skoða sig í stærra samhengi og ímynda sér aðra möguleika veruleiksins. Allt þjóðfélagið er að ýta karlmanninum í ákveðinn hugsunarhátt.“

Hin grátlega, kosmíska fyndni

Óli segir karlmanninn ekki hafa eðlislægt þann sjálfskoðara sem konan hafi, sem geri honum vissulega kleift að fara hraðar yfir í framkvæmdum heldur en konan, en hann skilji fyrir vikið stundum eftir sig sviðna jörð. Og konan þarf oft að koma í kjölfarið og laga til.

„Þetta er saga mannskepnunnar í gegnum árhundruðin. Þetta er hin grátlega kosmíska fyndni, leikur hinna tveggja afla, karla og kvenna, sem lífið hefur búið til. Afla sem eru ólík en eru alltaf að reyna að skilja hvort annað, breyta hvort öðru og endalaust að vesenast hvort í öðru,“ segir Óli.

„Vegna einfaldleika og hraða karlmannsins tekur hann oft miður góðar ákvarðanir sem bitna á honum sjálfum og samfélaginu öllu.

Við búum enn í mjög karllægu samfélagi þó við höldum annað, allar ákvarðanir eru karllægar og líka menningin. Við sjáum þetta í kristninni, dómskerfinu, bankakerfinu og stjórnum landsins, þetta er allt enn stútfullt af körlum. Þetta er það sem stjórnar allri orkunni hjá okkur og við erum hugsanlega miklu lengra frá því en við höldum að fá inn kvenlæga orku í ákvarðanatökur, fyrirtækjamenningu, listsköpun, læknisfræðina og annað sem er hluti af lífi okkar.“

Samanstendur af sögum, léttleika, skýrleika og „peppi“

Í auglýsingu námskeiðsins kemur fram: Andagift býður upp á 6 vikna námskeið fyrir karla sem samanstendur af sögum, léttleika, skýrleika og „peppi“ sem miða að því marki að birta karlmanninn í sinni kröftugustu og fegurstu mynd. Gerðar verða æfingar til að átta sig á stærð sinni nú þegar, auk þess að draga draumsýn sína (óskasjálfið) inn í veruleikinn. Þar er notast við kakó, leidda hugleiðslu með tónslökun. Kennt er á mánudögum frá 21. jan til 25. feb. frá kl. 19.45 til 21.00.

Farið verður í ferðalag þar sem við áttum okkur á persónunni, komum auga á grímurnar okkar, leggjum þær niður og setjum í hlutlausan. Njótum slökunar og sköpum rými fyrir skýra drauma og frjálsari huga. Súkkulaðið sem notast er við er 100% hreint og kemur frá Gvatemala. Það hefur þann eiginleika að skerpa einbeitingu og færa okkur dýpri hugleiðslu og slökun. Kennari er Ólafur Stefánsson. Skráning á vefsíðu: andagift.is/vara/karlakako. Eða senda tölvupóst á netfangið: andagift@andagift.is.