Hálka og hálkublettir eru á öllum stofnbrautum á höfuðborgarsvæðinu en starfsmenn Reykjavíkurborgar hafa frá því nótt verið að hreinsa götur og stíga.
Dagurinn byrjar á klassísku vetrarveðri, suðvestanátt og éljum um landið sunnan- og vestanvert, en víða léttskýjað fyrir austan og frost um allt land. Upp úr hádegi dregur þó heldur úr vindi og éljum.
Um kvöldmatarleytið koma skil upp að landinu suðvestanverðu með suðaustanhvassviðri eða -stormi og snjókomu, en síðar slyddu og rigningu á láglendi og hlýnandi veðri.
Gular viðvaranir eru í gildi í nokkra klukkutíma í kvöld vegna hríðarveðurs suðvestanlands og á Breiðafirði. Þær viðvaranir eiga einkum við um heiðar og uppsveitir, segir í hugleiðingum veðurfræðings á Veðurstofu Íslands.
Eftir snjókomu gærdagsins og áframhaldandi éljagang í dag eru líkur á að eitthvað af snjónum muni bráðna í kvöld þegar hlýnar, en á morgun kólnar aftur og er því viðbúið að svell myndist.
Hálkublettir og éljagangur er á Reykjanesbraut og á Grindavíkurvegi, hálka og éljagangur er á Hellisheiði, Sandskeiði og á Vesturlandsvegi upp í Borgarfjörð, annars er snjóþekja og éljagangur á öðrum leiðum, samkvæmt upplýsingum frá Vegagerðinni.
Hálka og skafrenningur er á Holtavörðuheiði en þungfært og éljagangur á Bröttubrekku. Snjóþekja, hálka og éljagangur á öllum öðrum leiðum.
Snjóþekja og hálka og eitthvað um éljagang á öllum leiðum á Vestfjörðum og á Norðurlandi er vetrarfærð, snjóþekja, hálka og hálkublettir.
Á Norðausturlandi er snjóþekja og hálka á Norðausturvegi (85) en hálka, snjóþekja og skafrenningur inn til landsins.
Hálka er á Héraði en snjóþekja á Jökuldal. Hálka er á Fjarðarheiði og Fagradal en hálkublettir eru með ströndinni.
Á Suðausturlandi er hálka, hálkublettir og eitthvað um éljagang og svipaða sögu er að segja af Suðurlandi.