Laura Carter, rannsakandi Amnesty International, segir að það hafi komið verulega á óvart hversu miklar hindranir mæta fólki, með líffræðileg kyneinkenni sem eru ekki dæmigerð fyrir karlmenn eða konur, á Íslandi. Því Ísland hafi þá ímynd meðal annarra ríkja Evrópu að vera framarlega þegar kemur að jafnrétti. Carter stýrði rannsókn á stöðu intersex fólks á Íslandi í fyrra en skýrsla Amnesty International, No Shame in Diversity: The right to health for people with variations of sex characteristics in Iceland, kom út í dag.
„Í ljósi þessa kom það okkur sem unnum rannsóknina á óvart hversu margir þeirra sem við ræddum við á Íslandi hafa upplifað skömm á grundvelli þess að hafa fæðst með ódæmigerð kyneinkenni,“ segir Carter en hún er stödd hér á landi vegna útgáfu skýrslunnar.
Carter stýrði svipuðum rannsóknum á vegum Amnesty International í Danmörku og Þýskalandi og segir að upplifun fólks sé ekki ólík þar fyrir utan að smæð Íslands magni upp þær hindranir, leyndarhyggju og skömm sem einkenni málefni intersex fólks á Íslandi.
Í stærri samfélögum upplifi fólk ekki eins mikla einangrun og það gerir hér og auðveldara að komast í samband við aðra sem deila sömu reynslu.
Amnesty International bendir á að þrátt fyrir að jöfnuður milli kynjanna sé, samkvæmt Alþjóðaefnahagsráðinu, hvergi meiri en hérlendis og að Ísland tróni í efsta sæti yfir kynjajöfnuð níunda árið í röð, bregðast íslensk stjórnvöld enn því hlutverki sínu að koma á mannréttindamiðuðu verklagi innan heilbrigðisþjónustunnar og tryggja einstaklingum með ódæmigerð kyneinkenni þá þjónustu sem þeir þurfa á að halda.
„Ísland er þekkt fyrir jafnrétti kynjanna. Engu að síður veldur það miklum áhyggjum hvernig heilbrigðiskerfið á Íslandi sinnir intersex fólki. Litið er á intersex börn og fullorðna sem vandamál sem þurfi að laga og sú staðreynd að þau skortir heilbrigðisþjónustu sem tekur mið af mannréttindum þeirra, getur valdið líkamlegri og andlegri þjáningu, lífið á enda,“ segir Laura Carter.
Áætlað er að í kringum 68 börn fæðist með ódæmigerð líffræðileg kyneinkenni á hverju ári á Íslandi, þ.e. hormónastarfsemi, kynkirtla, kynlitninga eða kyn- og æxlunarfæri sem eru með einhverju móti öðruvísi en hjá flestum konum og körlum sem þýðir að heildarfjöldi einstaklinga með ódæmigerð kyneinkenni er um 6.000 manns.
Einstaklingar sem fæðast með líffræðileg kyneinkenni sem eru ekki dæmigerð fyrir karlmenn eða konur sæta hindrunum í aðgengi að fullnægjandi heilbrigðisþjónustu á Íslandi. Það stofnar líkamlegri og andlegri heilsu þeirra í hættu, að sögn Amnesty International.
Í skýrslunni kemur fram að læknar og aðrir sérfræðingar hafi lagt á það áherslu að „laga vandamálið“ og foreldrar jafnvel beðnir um að þegja um að barn þeirra hafi fæðst með ódæmigerð kyneinkenni. Carter segist telja að læknar vilji vel en þeir viti einfaldlega ekki betur en að þeir séu að gera barninu greiða. Þess í stað er verið að meina barni eðlileg mannréttindi og að ekki sé litið á þá, sem ekki falla fyllilega undir skilgreiningar á karli og konu, sem vandamál. Miklu skipti að veita fólki eðlilegt aðgengi að heilbrigðisþjónustu og það verði best gert með teymisvinnu. Því stuðningurinn er á ýmsa vegu og ekki bara fyrir viðkomandi barn heldur einnig fjölskyldur þess. Í stað þess að líta svo á að allir þurfi að vera annaðhvort karl eða kona.
Carter fagnar nýju frumvarpi til laga sem ríkisstjórnin hefur lagt fram um kynrænt sjálfræði í samræmi við nýútkomin tilmæli Evrópuráðsins vegna mannréttinda intersex fólks. Aftur á móti sakni hún þess að ekki sé í frumvarpinu lagt bann við ónauðsynlegum skurðaðgerðum, ófrjósemisaðgerðum á intersex börnum. Líkt og Evrópuráðið hefur samþykkt. Eins hefði verið gott að sjá betur kveðið á um stuðning við fólk með ódæmigerð líffræðileg kyneinkenni.
Laura Carter segir að þetta verði rætt frekar við starfsfólk í forsætisráðuneytinu og hún á von á því að funda með því varðandi skýrsluna og þær aðgerðir sem Amnesty International leggur til varðandi stöðu fólks með ódæmigerð kyneinkenni.
Áætlað er að í kringum 68 börn fæðist með ódæmigerð líffræðileg kyneinkenni á hverju ári á Íslandi, þ.e. hormónastarfsemi, kynkirtla, kynlitninga eða kyn- og æxlunarfæri sem eru með einhverju móti öðruvísi en hjá flestum konum og körlum sem þýðir að heildarfjöldi einstaklinga með ódæmigerð kyneinkenni er um 6.000 manns.
Carter segir mikilvægt að auka fræðslu á þessu sviði meðal læknanema á Íslandi. Að tryggja að þekking sé fyrir hendi svo Ísland geti boðið þegnum sínum fyrsta flokks heilbrigðisþjónustu. Eins að unglæknar fái þá fræðslu í starfi að þeir geti veitt fólki þá þjónustu sem er í samræmi við mannréttindamiðað verklag.
„Við erum að tala um 68 börn á ári sem er ekki lítil tala miðað við stærð Íslands. Fólk þarf á ýmiss konar stuðningi að halda, bæði lækna, sálfræðinga og annarra sérfræðinga. Eins þurfa foreldrarnir á aðstoð að halda. Þetta á að vera teymi sérfræðinga sem kemur að hverju barni sem þarf á sérstökum stuðningi að halda. Það er ekki hægt að ætlast til þess að einn læknir geti tekið allar þær ákvarðanir sem taka þarf og veita þann faglega stuðning sem börn þurfa á að halda,“ segir Laura Carter.
Spurð út í orðanotkunina „vandamál“ líkt og fram kemur í skýrslunni þegar kemur að börnum með ódæmigerð kyneinkenni segir Carter að þetta sé ekki það viðhorf sem fólk þarf á að halda þegar foreldrar eignast börn. Að litið sé á nýfædda einstaklinga sem „vandamál“ í stað þess að veita fjölskyldunni þann stuðning sem hún þarf á að halda og þar með draga úr líkum á vanlíðan síðar á lífsleiðinni. Ekki síst að koma í veg fyrir að gerðar séu óafturkræfar aðgerðir á börnum sem geta haft alvarlegar afleiðingar í för með sér. „Þau þurfa á stuðningi og aðstoða að halda ekki fordæmingu,“ segir Laura Carter.