FKA og RÚV í samstarf um fjölbreytni

Félag kvenna í atvinnulífinu og Ríkisútvarpið hafa undirritað samstarf um verkefni sem ætlað er að auka fjölbreytni viðmælenda í íslenskum fjölmiðlum, en í því felst að FKA mun auglýsa eftir konum vítt og breytt úr samfélaginu sem hafa áhuga á þjálfun í að miðla sérþekkingu sinni í fjölmiðlum.

Þetta kemur fram í tilkynningu frá RÚV í framhaldi af Fjölmiðladegi FKA sem haldinn var í gær. Þar var skorað á fjölmiðla að jafna kynjahlutföll viðmælenda sinna í fréttum.

Frétt af mbl.is

Feimnismál í fyrstu en nú sjálfsagt mál

Árlega næstu þrjú ár verður haldið hagnýtt námskeið í húsakynnum RÚV þar sem þátttakendur fá leiðsögn og tækifæri til að spreyta sig sem viðmælendur við raunverulegar aðstæður í útvarpi og sjónvarpi, og velur nefnd FKA fjölbreyttan hóp kvenna til að taka þátt og leggur til reynda kennara til verksins.

„Fjölmiðlaverkefni FKA hefur staðið yfir frá 2013 og á þeim tíma höfum við séð mikla breytingu á viðhorfi og áhuga fjölmiðla að auka ásýnd kvenna sem viðmælendur í öllum málum. Þetta verkefni er frábært að því leyti að það gagnast ekki aðeins þeim konum sem taka þátt, heldur öllum fjölmiðlum og fjölmiðlaneytendum á Íslandi,“ segir Rakel Sveinsdóttir, framkvæmdastjóri FKA.

„Jafnrétti er alger undirstaða í dagskrá og starfsemi RÚV. Frá upphafi árs 2016 hefur verið haldið nákvæmt kynjabókhald yfir dagskrá RÚV og við erum stolt af því að algert jafnvægi er á milli kynja í hópi viðmælenda í dagskrá RÚV. Á hinn bóginn er enn nokkuð í að jafnvægi náist meðal viðmælenda í fréttum þó bilið hafi minnkað hjá RÚV á undanförnum árum, það er nú 63% karlar og 37% konur.  Og þó RÚV skeri sig frá flestum öðrum miðlum hérlendis og erlendis hvað þetta varðar þá viljum við halda áfram að gera betur,“ sagði Magnús Geir Þórðarson útvarpsstjóri við undirritun samstarfsins.

• Blogga um frétt