Í drögum að viðauka við fjárhagsáætlun Sveitarfélagsins Skagafjarðar er gert ráð fyrir því að fjárfesting eignasjóðs hækki um 97,5 milljónir króna vegna framkvæmda við Aðalgötu 21 á Sauðárkróki þar sem sýndarveruleikasýning á að vera til húsa. Viðfangsefnið verður Sturlungaöld.
Ólafur Bjarni Haraldsson, fulltrúi Byggðalista í sveitarstjórn, segir í pistli sínum ekki vera um 15% framúrkeyrslu að ræða eins og haldið hefur verið fram.
Þar segir hann að kostnaðaráætlun vegna framkvæmda við húsnæðið hljóði upp á rúmar 189 milljónir króna.
Hann bendir á að samþykktur hafi verið viðauki við fjárhagsáætlun 2018 upp á 120 milljónir króna til að ljúka viðhaldi innan- og utanhúss og að þær hafi bæst við þær 80 milljónir króna sem upphaflega voru á fjárhagsáætlun. Því sé fjármagnið orðið 200 milljónir króna með rúmum 10 milljónum fyrir auka- og/eða viðbótarverk.
Nú liggi fyrir sveitarstjórn viðauki upp á 97,5 milljónir króna til að ljúka framkvæmdunum og því hafi alls 297,5 milljónir króna verið áætlaðar í verkið.
„Sveitarstjórn sveitarfélagsins Skagafjarðar áætlaði 200 milljónir til þess að ljúka innan- og utanhúss viðhaldi á fasteignunum við Aðalgötu 21, sem nú eru orðnar tæpar 300 milljónir. Það eru ekki 15%, alveg sama hvort um sé að ræða eitt stórt klúður, eða mörg ný og smærri,“ skrifar hann í pistli sínum.
Ráðgjafafyrirtækið Deloiette var fengið til að gera fjárhagslega úttekt á áhrifum uppsetningar á sýndarveruleiaksýningunni. Það telur að sveitarfélagið muni hagnast um 195 milljónir króna af verkefninu á samningstímanum, sem er 30 ár. Gert er ráð fyrir að 10 manns muni starfa hjá fyrirtækinu til að byrja með og þeim verði fjölgað þegar fram líða stundir. Sveitarfélagið fær með framlagi sínu 10% eignarhlut í Sýndarveruleika ehf., að því er segir í bókun frá því í desember í fyrra.