Mikið reyk- og vatnstjón í Seljaskóla
Setja bókamerki
Slökkvistarfi er formlega lokið í Seljaskóla en slökkvilið höfuðborgarsvæðisins hefur unnið að því að slökkva eld sem kviknaði í þaki skólabyggingar á skólalóðinni laust eftir miðnætti í gær. Slökkvistarf tók um hálfan sólarhring.
„Þetta er á lokametrunum. Við erum að pakka saman en það verða tveir menn hér áfram til að fylgjast með ef eitthvað gerist,“ segir Rúnar Helgason, varðstjóri, í samtali við mbl.is.
Búið er að reykræsta bygginguna og nú vinna verktakar frá tryggingarfélögum að hreinsunarstarfi sem mun líklega standa fram eftir degi. Lögreglu verður afhentur vettvangur fljótlega eftir hádegi að sögn Rúnars.
Ljóst er að mikið tjón er í byggingunni, bæði vegna brunans sjálfs en einnig er um að ræða vatns- og reyktjón. „Það er mikið tjón, en það á eftir að meta það betur.“
Rúnar segir að bruninn í nótt hafi verið með því stærra sem slökkviliðið fæst við alla jafna. „Þetta var býsna stórt verkefni, það eru bara þessir svaka stóru sem toppa þetta, en þetta var það mikið að allt tiltekið lið á frívakt var kallað út.“
Hefur áhrif á 200 nemendur
Bruninn hefur áhrif á skólastarf Seljaskóla á morgun og næstu daga en Magnús Þór Jónsson, skólastjóri Seljaskóla, sagði í samtali við blaðamann mbl.is fyrir utan skólann í nótt að von sé á einhverri röskun á skólastarfi vegna eldsins en að kennt verði á morgun.
Fram kom í hádegisfréttum RÚV að um þriðjungur nemenda við skólann, um 200 talsins, mætir í hluta kennslustunda annars staðar en í sínum bekkjarstofum þar sem eftir er skólaársins. Er það að hluta til vegna brunans í nótt, þar sem sex kennslustofur eru í 400 fermetra rými, en einnig vegna eldvoðans sem kom upp í annarri byggingu skólans í mars.
Þá er ljóst að töluvert tjón varð á munum skólans sem voru inni í byggingunni. Þar á meðal eru 60 spjaldtölvur sem nemendur voru nýlegar búnir að fá en Bára Birgisdóttir, aðstoðarskólastjóri Seljaskóla, sagði í fréttum RÚV að það skýrist seinna í dag hvort spjaldtölvurnar hafi orðið fyrir skemmdum.
Upphafsfasinn hættulegastur
„Verulega brugðið að sjá þennan þátt“
„Höfum verk að vinna en ég er bjartsýnn“
Eðlilegt að fjör sé að færast í leikinn
Vopnahlé sýnd veiði en ekki gefin
Segja ekkert komið fram sem sanni sök flugmannsins
Áfram í haldi grunaður um manndráp
Vinna hafin við gerð nýs varnargarðs