Samþykkja aðkomu að Secret Solstice

Frá Secret Solstice hátíðinni í fyrra.
Frá Secret Solstice hátíðinni í fyrra. mbl.is/Árni Sæberg

Borgarráð samþykkti í dag að styrkja tónlistarhátíðina Secret Solstice um átta milljónir króna á þeim forsendum að hátíðin höfði meira til fjölskyldufólks en áður hefur verið. Rennur styrkurinn upp í ógreidda skuld aðstandenda hátíðarinnar við Reykjavíkurborg.

Hátíðin verður þar með haldin í sjötta sinn, en mun standa einum degi styttra í ár og fara fram 21.-23. júní. Samkvæmt drögum að samningi sem borgarráð samþykkti kemur fram að dagskrá verði að vera lokið klukkan 23.30 á kvöldin og mikil áhersla verður lögð á forvarnir og öryggismál.

Tví­sýnt var um tíma um stöðu hátíðar­inn­ar gagn­vart Reykja­vík­ur­borg og hátíðin var sögð skulda borg­inni 10 millj­ón­ir. Nýir eig­end­ur hafa þó tekið við hátíðinni og er undirbúningur á svæðinu þegar hafinn.

mbl.is