Forsætisráðuneytið hefur ekki fengið skilagrein frá sáttanefnd stjórnvalda sem skipuð var til að leiða sáttaviðræður við fyrrverandi sakborninga í Guðmundar- og Geirfinnsmálinu. Þetta kemur fram í tilkynningu frá ráðuneytinu.
Ragnar Aðalsteinsson, lögmaður eins hinna sýknuðu, sagði í samtali við mbl.is í morgun að ríkið hafi slitið samningaviðræðunum í sáttaumleitunum milli stjórnvalda og hinna nýsýknuðu og aðstandenda þeirra. Segir hann að engin önnur úrlausn sé í málinu en að leita til dómstóla.
Í tilkynningu frá forsætisráðuneytinu segir hins vegar að ráðuneytið líti hvorki svo á að sáttaviðræðum sé formlega lokið né hlutverki setts ríkislögmanns, sem falið var að ljúka málinu annaðhvort á grundvelli breiðrar sáttar eða viðræðna við hvern og einn sem sýknaðir voru eða aðstandendur þeirra.