Vel gekk að koma hvalhræi sem lá í fjörunni við Eiðsgranda á brott. Heilbrigðiseftirlit Reykjavíkur vann að því í samvinnu við Umhverfisstofnun að koma hræinu, sem var illa lyktandi, á brott og var mætt á svæðið með krana um ellefuleytið í morgun.
Það var svo rétt fyrir klukkan tólf sem búið var að koma hvalnum, sem var hrefna, upp á vörubíl á leið á urðunarstöð Sorpu í Álfsnesi þar sem hræið verður urðað.
Þorgrímur Hallgrímsson, rekstrarstjóri hverfastöðvar umhverfis- og skipulagssviðs á Njarðargötunni, hafði umsjón með verkinu. Hann segir vel hafa gengið að koma hvalnum upp á vörubílinn. „Við fengum stóran 100 tonna krana sem náði út í fjöruna,“ segir hann. Hvalurinn hafi verið dreginn þangað, slegið í sporðinn á honum og hann svo hífður upp á vörubílinn.
„Menn hafa kvartað svolítið yfir lyktinni,“ segir hann um þá sem unnu að því að fjarlægja hræið, en stækan fnyk lagði af dýrinu. Sjálfur segist Þorsteinn hins vegar alinn upp á hrefnu og kannist við lyktina.
Lögregla fékk fyrst tilkynningu um hvalrekann kl. 12.53 í gær, en þá sást hræið fljóta í sjónum um 300 metra frá landi við Gróttu á Seltjarnarnesi.
Hræið rak síðan á fjörur Reykvíkinga, í orðanna bókstaflegu merkingu, og var það því á ábyrgð borgarinnar sem landeiganda að koma því í burtu.
Rauði belgurinn, sem er tunga hvalsins, vakti athygli margra en tungan blés út eftir að dýrið drapst vegna gerjunar í kviðar- og brjóstholi og var talinn einhver hætta á að dýrið gæti sprungið.
Þorgrímur segir það hins vegar ekki hafa gerst. Hrefnan hafi komist heilu og höldnu upp á vörubílinn og á brott úr fjörunni.