Vöruval hætt rekstri

Kaupmaðurinn á horninu í Vestmannaeyjum gafst upp fyrir lágverðsverslunum á laugardag þegar versluninni Vöruvali, sem hefur verið í kúluhúsi í miðbæ Vestmannaeyja, var lokað.

Ingimar Heiðar Georgsson og Hjördís Inga Arnarsdóttir hafa rekið Vöruval í tæp 20 ár. Ingimar segir að hallað hafi undan fæti eftir að verslun Bónuss var opnuð 2016 en fyrir var Krónan með verslun í bænum.

Hann segir 1.400 heimili ekki geta haldið uppi tveimur lágverðsverslunum og kaupmanninum á horninu. Þar á ofan bætist við ótryggar samgöngur og loðnubrestur. Ingimar segir Vöruval hafa verið með lengri afgreiðslutíma og lagt áherslu á ýmsa sérþjónustu sem nú hverfi úr Eyjum.