„Það er til marks um ýmislegt að yfirrétturinn ætlar að taka þetta fyrir,“ sagði Sigríður Á. Andersen, fyrrverandi dómsmálaráðherra, í kvöldfréttum Ríkisútvarpsins í kvöld. Hún ítrekaði þá skoðun sína að út frá sjónarhóli íslenska réttarríkisins hefði niðurstaða yfirréttar MDE um að taka landsréttarmálið fyrir engin áhrif.
Sigríður sagði Hæstarétt Íslands eina dómstólinn sem gæti tekið afstöðu til þess hvort dómarar væru löglega skipaðir eða ekki. Landsréttarmálið fjallar um það hvernig staðið var að skipun fjögurra dómara við Landsrétt.
Dómstóllinn komst að þeirri niðurstöðu í mars að íslenska ríkið hefði brotið gegn sjöttu grein Mannréttindasáttmála Evrópu og var ríkið dæmt til að greiða 15 þúsund evrur í málskostnað. Stjórnvöld áfrýjuðu dómnum og nú er ljóst að yfirdeild MDE mun taka málið fyrir.
„Að mínu mati er dómurinn, sem féll 11. mars, lögfræðilega rangur og ber þess sterk merki að vera pólitískt at,“ sagði Sigríður. Að því leyti sé fínt að MDE fái að skoða málið aftur.
Hún sagði enga réttaróvissu ríkja og að allir dómarar væru löglega skipaðir. Hæstiréttur væri eini dómstóllinn sem gæti tekið afstöðu til skipunar dómara og ekkert breytti því í Strasbourg.