Íslenskt verkefni sem Þekking, Lögreglan á höfuðborgarsvæðinu og Landspítalinn háskólasjúkrahús unnu að í sameiningu, sigraði í Media Management Award en tilkynnt var um úrslitin í morgun.
Verkefnið snerist um að deila upplýsingum á milli rannsóknaraðila Lögreglunnar og Landspítala háskólasjúkrahúss í öruggum skráarskiptum, að því er segir í tilkynningu.
Verkefnið, sem var leitt af Þekkingu og vinnuhópum frá Lögreglunni á höfuðborgarsvæðinu og Landspítalanum háskólasjúkrahúsi, fékk mjög góða umsögn frá dómnefnd Media Management Award en þar sagði m.a.: „Verkefnið sýnir mestu nýsköpunina í framúrskarandi útfærslu á meðferð viðkvæmra gagna. Framkvæmd verkefnisins er nýstárleg á heimsmælikvarða og er dæmi um samstarfsaðferð sem ekki hefur verið notuð áður. Verkefnið undirstrikar mikilvægi og þörf á því að deila upplýsingum á milli stofnana ásamt því hvernig tækni nýtist frábærlega þeim sem starfa við að tryggja öryggi þegna og samfélags.“
Tvö önnu verkefni voru tilnefnd til fyrstu verðlauna: Springer Medizin og National Institute of Dramatic Art (NIDA).
„Það kom okkur þægilega á óvart að vera tilnefnd til þessara verðlauna og auðvitað enn betra að við skyldum enda sem sigurvegarar á móti þessum flottu verkefnum,“ er haft eftir Steingrími Fannari Stefánssyni, sérfræðingi hjá Þekkingu, í tilkynningu.
„Þetta sýnir okkur að við erum að vinna á heimsmælikvarða og það þarf oft að minna sig á að þó svo að Ísland sé ekki fjölmennt, þá eigum við frábæra sérfræðinga í þekkingargeiranum,“ segir Steingrímur ennfremur.
Þekking er samstarfsaðili FotoWare sem sérhæfir sig í lausnum er varða utanumhald stafrænna gagna eins og mynda og teikninga svo dæmi séu tekin.