Fyrr í dag voru afhentir lyklar að nýjum íbúðakjarna á Móavegi 10 í Reykjavík. Dagur B. Eggertsson sá um afhendingu lyklanna við hátíðlega athöfn en í kjarnanum verður fimm einstaklingum gert kleift að halda eigið heimili með aðstoð starfsfólks. Þar að auki mun starfsemin í nýja kjarnanum veita ellefu öðrum einstaklingum í Grafarvogi þjónustu og stuðning til sjálfstæðs lífs á eigin heimili.
Regína Ástvaldsdóttir sviðsstjóri velferðarsviðs Reykjavíkurborgar, sagði að markmið þjónustunnar væri að styðja fólk til þess að eiga sjálfstætt og innihaldsríkt líf á eigin forsendum. Bygging íbúðakjarnans sé mikilvægur áfangi í að framfylgja húsnæðisáætlun og gott dæmi um vel heppnaða útfærslu þar sem félagsbústöðum er úthlutað ákveðnu hlutfalli af íbúðum við lóðaúthlutun.
Framkvæmdir við nýja íbúðakjarnann hófust í mars í fyrra. Segir í tilkynningu að kostnaðaráætlanir hafi staðist og framkvæmdatími sé skemmri en gert var ráð fyrir. Þá hefur forstöðumaður íbúðakjarnans þegar hafið störf.