Innlent | mbl | 10.10.2019 | 8:55

Í beinni: Konur, friður og öryggi

Fjölmennt var á friðarráðstefnu Alþjóðamálastofnunar og Höfða í Veröld í fyrra og búast má við öðru eins í dag. mbl.is/Kristinn Magnússon

Áhersla á mikilvægt hlutverk kvenna, frumkvöðla og aðgerðasinna í friðarumleitunum og friðaruppbyggingu verða meðal áhersluþátta á árlegri friðarráðstefnu Höfða friðarseturs sem fram fer í Veröld, húsi Vigdísar, í Háskóla Íslands í dag.

Ráðstefnan er haldin í samstarfi við utanríkisráðuneytið og Jafnréttisskóla Háskóla Sameinuðu þjóðanna en þetta er í þriðja sinn sem Höfði, friðarsetur Reykjavíkurborgar og Háskóla Íslands, stendur fyrir ráðstefnu um friðarmál. Hægt er að fylgjast með ráðstefnunni í beinu streymi hér:

Ráðstefnan helst í hendur við nýjan vettvang, Snjallræði, þar sem einstaklingum, frjálsum félagasamtökum og fyrirtækjum gefst tækifæri til að vinna að samfélagslega mikilvægum verkefnum í átta vikna hraðli. Teymin sem taka þátt í Snjallræði 2019 verða kynnt til leiks við hátíðlega athöfn á ráðstefnunni.

Jón Atli Benediktsson, rektor Háskóla Íslands, og Guðni Th. Jóhannesson, forseti Íslands, munu ávarpa ráðstefnugesti við upphaf ráðstefnunnar en dagskrána í heild sinni má nálgast hér.

Meðal fyrirlesara á ráðstefnunni verða:

Madeleine Rees, framkvæmdastjóri alþjóðasambands kvenna fyrir friði og frelsi (WILPF).
Aya Mohammed Abdullha, talskona UNHCR.
Mariam Safi, forstöðumaður rannsóknarseturs um stefnumótun og þróunarfræði (DROPS).
Bronagh Hinds, meðstofnandi Northern Ireland Women's Coalition og stofnandi DemocraShe.
Fawzia Koofi, afgönsk þingkona og baráttukona fyrir réttindum kvenna.
Zinat Pirzadeh uppistandari og rithöfundur.
Aiko Holvikivi, fræðimaður hjá rannsóknarsetri LSE um konur, frið og öryggi.
Harriet Adong, framkvæmdastjóri FIRD, Foundation for Integrated Rural Development í Úganda.
T Ortiz, mannréttindafrömuður, sérfræðingur hjá miðstöð gegn mansali í Baltimore og stofnandi TalkWithT.com.