„Ég fagna þessari niðurstöðu auðvitað, en hún kemur ekki á óvart. Ég hef alltaf vitað að ég myndi fá þessar upplýsingar á endanum.“ Þetta segir Ari Brynjólfsson, blaðamaður á Fréttablaðinu, en Héraðsdómur Reykjaness úrskurðaði í morgun honum í vil í máli sem Seðlabanki Íslands höfðaði á hendur honum.
Í samtali við mbl.is í dag sagði Stefán Jóhann Stefánsson, ristjóri Seðlabankans, að ekki hefði verið tekin ákvörðun um hvort málinu verður áfrýjað. Ari hefur því ekki enn fengið upplýsingarnar í hendur. „Ég á eftir að fara yfir það með lögmanni mínum hvað þeir hafa langan tíma til að afhenda gögnin. En ég mun fara fram á þau sem fyrst, mögulega í dag,“ segir Ari.
Í nóvember í fyrra sendi Ari fyrirspurn á bankann þar sem óskað var eftir upplýsingum um tilhögun námsleyfis Ingibjargar Guðbjartsdóttur, þáverandi framkvæmdastjóra gjaldeyriseftirlits bankans, árið 2016 en hún sótti MPA-nám í Bandaríkjunum veturinn 2016—2017, en sneri ekki aftur til starfa hjá bankanum að námi loknu.
Seðlabankinn neitaði að svara fyrirspurninni og kærði Ari bankann því til úrskurðarnefndar um upplýsingamál, sem úrskurðaði honum í vil í júlí. Bankinn freistaði þess í héraðsdómi að fá úrskurði úrskurðarnefndar um upplýsingamál hnekkt en hafði, sem fyrr segir, ekki erindi sem erfiði.
Fyrir dómi tókust deiluaðilar á um eðli samningsins milli Ingibjargar og bankans. Í máli Seðlabanka Íslands kom fram að Ingibjörg hefði fengið námsstyrkinn vegna „sérstakrar hæfni, árangurs og álags í starfi“ og styrkurinn teldist því „viðbótarlaun“ og flokkaðist því ekki undir föst launakjör, sem eru opinberar upplýsingar. Þessu hafnaði lögmaður blaðamanns. Laun væru laun, og velti hann því upp hvort sami „leyndarhjúpur“ ríkti ef Ingibjörg hefði fengið bíl eða „gullstöng úr kistunni“.