Svo kom Samherji

Sighvatur Björgvinsson var framkvæmdastjóri ÞSSÍ.
Sighvatur Björgvinsson var framkvæmdastjóri ÞSSÍ.

Sighvatur Björgvinsson, fyrrverandi ráðherra og framkvæmdastjóri Þróunarsamvinnustofnunar Íslands, var í áfalli þegar fréttastofa RÚV ræddi við hann í gærkvöldi eftir umfjöllun Kveiks um Samherjaskjölin. Öll uppbygging sem unnið hafi verið að í Namibíu hafi hrunið með komu Samherja. Hann segir málið skelfilegt og vonast til að því sé ekki lokið. Þetta kemur fram á vef RÚV .

Sighvatur segir Namibíumenn ekkert hafa kunnað til sjómennsku eða fiskverkunar og því beðið um aðstoð frá Íslandi. „Við veittum hana, ekki bara Þróunarsamvinnustofnun, heldur fjöldi íslenskra skipstjórnarmanna sem komu og hjálpuðu.“

Íslendingar hafi rekið fyrir þá Landhelgisgæslu, Hafrannsóknastofnun, búið til kvótakerfi fyrir þá og markaðskerfi, veiðileyfisgjaldið, sem ekki hafi tekist að koma á hér á landi.

„Við fylgdumst með því á meðan við vorum þarna hvernig þetta væri rekið og gerðum ekki athugasemdir nema mjög sjaldan. Síðan förum við 2008 og síðan kemur Samherji — og þetta er allt hrunið.“

Sighvatur segist ekki kunna að meta það hvort eitthvað saknæmt hafi átt sér stað. Koma verði í ljós hvort brotin sem þarna hafi verið framin séu fyrnd. Hann segist spenntur að sjá viðbrögð þjóðarinnar því viðbrögð stjórnmálamanna fari oft eftir viðbrögðum þjóðarinnar. Þá bendir hann á að íslenska ríkisstjórnin sé núna að leggja til að lækka veiðileyfagjöld á Samherja um stórfé.

mbl.is

Bloggað um fréttina