Spáð er allt að fimmtán stiga frosti í dag og verður kaldast inn til landsins. Dregur úr frosti í næstu viku en ólíklegt er að það fari yfir frostmark. Þannig að á meðan ekki þiðnar aukast líkurnar á hvítum jólum, að sögn veðurfræðings á Veðurstofu Íslands.
„Svo virðist sem norðaustanáttin sé ekkert að fara að gefa eftir næstu vikuna eða svo. Lengst af éljagangur fyrir norðan og austan og jafnvel snjókoma um tíma, einkum á sunnudag. Yfirleitt þurrt sunnan til á landinu en líkur á stöku éljum af og til. Kalt í veðri fram eftir helgi, einkum inn til landsins en dregur úr frosti í næstu viku og gæti hitinn farið upp undir frostmark við ströndina þótt áfram verði frost inn til landsins.
Á meðan ekki þiðnar aukast líkurnar á hvítum jólum,“ segir í hugleiðingum veðurfræðings Veðurstofu Íslands.
Norðlæg átt, 5-13 m/s. Él á N- og A-landi, en bjart með köflum annars staðar. Hvessir SA-til seint á morgun.
Frost 4 til 15 stig, kaldast inn til landsins.
Á laugardag:
Norðlæg eða breytileg átt 5-13 m/s og stöku él með N-ströndinni, annars víða bjart. Frost 3 til 15 stig, mildast við ströndina.
Á sunnudag og mánudag:
Norðaustan 8-15 m/s með ofankomu N- og A-til, en þurrt S-lands. Minnkandi frost.
Á þriðjudag, miðvikudag og fimmtudag:
Útlit fyrir áframhaldandi norðaustlæga átt með éljum við N- og A-ströndina, en annars yfirleitt þurrt. Frost 1 til 12 stig, kaldast inn til landsins.