Maðurinn sem grófst undir í snjóflóði sem féll í Móskarðshnúkum á fyrsta tímanum í dag er fundinn. Verið er að flytja hann á Landspítalann með þyrlu Landhelgisgæslunnar, sem er þangað væntanleg á næstu mínútum.
Þetta staðfesta bæði Ásgeir Þór Ásgeirsson yfirlögregluþjónn og Ásgeir Erlendsson, upplýsingafulltrúi Landhelgisgæslunnar, í samtali við mbl.is.
Samkvæmt þeim fyrrnefnda voru þrír menn á svæðinu þar sem snjóflóðið féll, á gönguleiðinni upp í Móskarðshnúka í Esjunni. Einn lenti undir flóðinu og er eins og áður segir á leið á Landspítalann með þyrlu Landhelgisgæslunnar.
Hinir tveir voru fluttir með sjúkrabíl á slysadeild. Ekki fást upplýsingar um líðan neins þeirra að svo stöddu.
Útkall vegna snjóflóðsins barst klukkan 12:32 og fannst maðurinn, sem grófst undir snjóflóðið, klukkan 14:25.
Björgunaraðgerðum á svæðinu er lokið en enn er unnið á vettvangi.
Fréttin hefur verið uppfærð.