Innlent | mbl | 13.2.2020 | 18:32 | Uppfært 19:21

Ástandið „verra en á Þorláksmessu“

Brauðið var eftirsóknarvert og flestar hillur tæmdust síðdegis. Ljósmynd/Aðsend

„Það er brjálað að gera, það er bara staðan, en það verður lítið að gera á morgun,“ segir Guðmundur Marteinsson, framkvæmdastjóri Bónuss.

Viðvörun vegna veðurs var uppfærð úr appelsínugulri í rauða fyrir höfuðborgarsvæðið síðdegis í dag og því segir Guðmundur að það hafi komið töluvert á óvart hversu mikið var að gera í verslunum Bónuss undir kvöld. „En við vorum búin að gera ráð fyrir að það yrði mikið að gera í dag,“ segir hann.

Langar raðir mynduðust við afgreiðslukassa í verslunum Bónuss og fleiri verslana síðdegis. mbl.is/Elín

Viðvörunin tekur gildi klukkan sex í fyrramálið og gildir til klukkan 11. Fólk virðist hafa vilja hafa varann á en mbl.is hefur eftir nokkrum viðskiptavinum að hillur voru farnar að tæmast á sjötta tímanum. Einn viðskiptavinur þurfti að þræða nokkrar Bónusverslanir eftir brauði en endað í Krónunni þar sem brauð var fáanlegt. Þá hafði annar orð á því að ástandið væri „verra en á Þorláksmessu“. Guðmundur segir að allt hafi þó gengið áfallalaust fyrir sig og fólk hafi almennt sýnt þolinmæði.

Brauð og fleiri nauðsynjavörur ruku úr hillunum. mbl.is

Verslanir opna seinna á morgun

Óveðrið hefur áhrif á afgreiðslutíma Bónuss á morgun, en verslanirnar opna öllu jafna klukkan 10 á föstudögum. „Við ætlum ekkert að láta starfsfólk okkar mæta fyrr en veðrið er gengið niður og taka síðan bara stöðuna,“ segir Guðmundur. Hann telur líklegt að verslanirnar opni í fyrsta lagi um hádegi á morgun.

„En við munum þurfa að vinna eitthvað fram eftir í kvöld og ganga frá og taka allt lauslegt inn,“ segir Guðmundur.