Fjöldi smitaðra af kórónuveirunni er orðinn 58. Þrjú ný smit greindust af þeim sýnum sem tekin voru af farþegum sem komu heim með flugi frá Veróna á Ítalíu í gær. Af öllum þessum smitum eru 10 innanlandssmit.
Mikill viðbúnaður var í gær þegar flugvélin lenti á Keflavíkurflugvelli. Allir farþegarnir sem voru um 80 talsins fóru í heimasóttkví. Við komuna til landsins voru tekin sýni úr þeim einstaklingum sem óskuðu eftir því.
Í samtali mbl.is við Rögnvald Ólafsson, verkefnastjóra almannavarna, við komu vélarinnar til landsins var ekki vitað til þess að nokkur farþeganna hafði einkenni COVID-19, sjúkdómsins sem kórónuveiran veldur.