Innlent | mbl | 19.3.2020 | 5:54 | Uppfært 9:09

Slökkvistarfi lauk klukkan 4

Fjölmennt lið slökkviliðsmanna tók þátt í slökkvistarfinu við Veltusund í nótt. mbl.is/Eggert Jóhannesson

Slökkvistarfi lauk í húsnæði Pablo discobar við Veltusund 1 um fjögur í nótt. Að sögn varðstjóra í slökkviliði höfuðborgarsvæðisins er tjónið mikið og mikil mildi að ekki fór verr.

Slökkviliðsmenn af öllum stöðvum höfuðborgarsvæðisins og aukamannskapur á frívöktum voru kallaðir út þegar tilkynnt var um eld í húsinu um klukkan 23 í gærkvöldi.

Frá slökkvistarfi við Veltusund í nótt. mbl.is/Eggert Jóhannesson

Slökkva í síðustu glóðunum

Þrítugur maður var handtekinn á vettvangi og samkvæmt upplýsingum frá lögreglu er maðurinn vistaður í fangageymslu í þágu rannsóknar málsins.

Rjúfa þurfti þak hússins að hluta en að sögn varðstjóra í slökkviliðinu var eldurinn bundinn við þriðju hæð hússins þar sem Pablo discobar er til húsa. Töluverðar skemmdir urðu á húsnæðinu vegna elds, sóts og vatns á öllum hæðum hússins.

Brunaveggur er á milli húsanna þar sem eldurinn kom upp og beindist slökkvistarf einnig að því að passa að eldur bærist ekki í nærliggjandi hús.

Lögreglan handtók einn á vettvangi en ekki er vitað hvort hann tengist eldsvoðanum. mbl.is/Eggert Jóhannesson

Slökkviliðið hefur afhent lögreglu vettvanginn og annast hún rannsókn á upptökum eldsvoðans. Ekki er vitað um eldsupptök en tæknideild lögreglunnar hefur rannsókn síðar í dag.