Spár gera ráð fyrir fremur aðgerðalitlu veðri fyrir hluta dags en síðdegis gengur í suðvestan hvassviðri með skúrum og síðar éljum. Bálhvasst verður um norðanvert landið í kvöld.
Það gengur í suðvestan 13 til 20 m/s eftir hádegi og fer kólnandi í kvöld.
Hiti verður á bilinu 2 til 8 stig í dag en spár gera ráð fyrir frosti um allt land í kvöld.
Fram kemur á veðurvefnum Bliku að þótt flestir fagni því að snjó hafi að mestu tekið upp á láglendi frá í gærkvöldi séum við ekki alveg sloppin við veðrið.
Bent er á að síðdegis herði á suðvestanáttinni og kólni. Él verða á Hellisheiðinni seinnipartinn með 14-17 m/s. Í fyrramálið snjóföl að nýju, ekki þó mikil, yfirleitt suðvestan- og vestantil.