Víða um land hafa bangsar brugðið á leik og setið úti í glugga svo börn geti komið og kíkt á þá, en uppátækið er hugsað fyrir börn til að stytta sér stundir í göngutúrum nú þegar samkomubann er í gildi.
Einn bangsi hefur þó tekið skrefið lengra en flestir aðrir, en það er Bangsinn Balli, sem búsettur er í Hléskógum í Seljahverfi í Breiðholti. Frá því er sagt á vef Breiðholtsfrétta að Balli sé bústinn bangsi í Breiðholti sem sitji ekki aðgerðalaus úti í glugga heldur láti verkin tala, og taki sér nýtt hlutverk á hverjum degi.
Hefur Balli m.a. gert við reiðhjól, rólað sér, farið á skíði, stundað snjósund, farið á hlaupahjól og málað mynd, en heimildir mbl.is herma að í dag standi Balli úti og baki.
Við hjá Árvakri viljum vekja athygli á því sem vel er gert á þessum erfiðu tímum. Ef þú ert með góða sögu af fyrirtækjum og einstaklingum sem eru að gera gott, sendu okkur ábendingu á netfangið stondumsaman@mbl.is.