Samninganefndir Félags íslenskra hjúkrunarfræðinga og ríkisins munu funda næst á miðvikudag en fundi í kjaradeilunni lauk nú í hádeginu. Um var að ræða fyrsta fundinn eftir að hjúkrunarfræðingar höfnuðu nýgerðum kjarasamningi við ríkið.
Guðbjörg Pálsdóttir, formaður félags hjúkrunarfræðinga, segir að ágætlega hafi gengið hjá ríkissáttasemjara í morgun.
Ætlunin sé að velta öllum steinum og kortleggja verkefnið sem framundan er. „Við fórum heim með smá heimavinnu og komum saman í næstu viku,“ segir Guðbjörg.
Guðbjörg vildi ekki tjá sig um hvort það hafi verið henni vonbrigði að nýundirritaður kjarasamningur var felldur.
„Þetta er bara niðurstaða félagsmanna og þeir hafa talað,“ segir hún.