„Á hverju ári myndast framtíðarskuld á ríkissjóð upp á 3 til 4 milljarða , það eru örorkubætur fyrir lífstíð sem þessi börn þurfa í framtíðinni,“ segir móðir 15 ára stúlku á einhverfurófi sem glímir við kvíða og þunglyndi.
Á hún þar við hóp barna í svipaðri stöðu og stúlkan sem bætast við kerfið á hverju ári en fá ekki meðferð. „Landspítalinn telur það ekki í sínum verkahring að hjálpa þeim,“ segir hún í sunnudagsblaði Morgunblaðsins sem út kom í morgun.
Ásmundur Einar Daðason, félags- og barnamálaráðherra, segir of marga falla á milli í kerfinu en tíma taki að breyta því. Allir séu að gera sitt besta en „vandinn er að þetta er eins og stórt olíuskip sem tímafrekt er að snúa“.