Guðlaugur Þór Þórðarson, utanríkis- og þróunarsamvinnuráðherra, fundaði með Jenis av Rana, mennta- og utanríkisráðherra Færeyja, í dag. Ráðherrarnir áréttuðu gagnkvæman ávinning þjóðanna af Hoyvíkursamningnum og lýstu yfir þeim vilja sínum að áfram verði haldið áfram að efla viðskipti landanna á grundvelli samningsins.
Þetta kemur fram í tilkynningu á vef Stjórnarráðsins. Jenis av Rana hefur verið í fríi hér á landi ásamt eiginkonu sinni Önnu av Rana.
„Samstarf frændþjóðanna hefur reynst heilladrjúgt í gegnum tíðina og var ánægjulegt að það skyldi takast að viðhalda Hoyvíkursamningnum sem innsiglar þessi nánu tengsl landanna. Færeyingar hafa reynst okkur vel og það er afar ánægjulegt að taka á móti ráðherranum og sýna honum landið okkar,“ sagði Guðlaugur Þór sem sýndi av Rana-hjónunum Snæfellsnes.
Ráðherrarnir ræddu einnig hvernig efla mætti samstarf á öðrum sviðum eins og menntamálum, meðal annars á framhalds- og háskólastigi. Þá upplýsti Guðlaugur Þór Þórðarson um stöðu viðræðna Íslands og Bretlands um framtíðarsamskipti ríkjanna vegna útgöngu Bretlands úr Evrópusambandinu og Evrópska efnahagssvæðinu. Þeir ræddu jafnframt alþjóðamál, þar með talið stöðu mála í Rússlandi og Kína.
Heimsfaraldur kórónuveiru bar á góma sem og efnahagslegar áskoranir honum tengdar og möguleika á nánara samstarfi á grundvelli árangursríkra viðbragða beggja ríkja við faraldrinum hingað til.
Á meðan á heimsókninni stendur mun færeyski ráðherrann einnig funda með menntamálaráðherra um samstarf landanna á sviði menntamála.