Sólin skín glatt í dag

Búast má við svipuðu veðri í dag og var í …
Búast má við svipuðu veðri í dag og var í gær þegar þessi mynd var tekin í Nauthólsvíkinni. mbl.is/Eggert Jóhannesson

Búast má við norðvestlægri átt á bilinu 3-8 m/s í dag og svo virðist sem sólin ætli að skína áfram glatt á stóran hluta landsins að því er fram kemur í hugleiðingum veðurfræðings á Veðurstofu Íslands.

„Stöku síðdegisskúrir munu láta á sér kræla á sunnanverðu landinu ef að líkum lætur, en að öðru leyti er ekki búist við úrkomu. Hitinn verður áþekkur því sem hann var í gær. Nokkuð víða 13 til 18 stig yfir daginn en svalara við norðurströndina þar sem loftið kemur beint af hafi.

Spáin fyrir morgundaginn er síðan svipuð og spáin í dag. Áttin áfram norðvestlæg, en eilítið ákveðnari vindur, á bilinu 5-10 m/s á morgun. Þokkalega bjart á landinu svona heilt yfir þó má búast við heldur fleiri skýjum á lofti en í dag.

Áfram líkur á stöku síðdegisskúrum á sunnanverðu landinu og hámarkshiti dagsins kringum 18 stigin,“ segir í hugleiðingum veðurfræðings.

Veðurspáin fyrir næstu daga

Vestan og norðvestan 3-8 m/s í dag, en 5-10 á morgun. Víða þurrt og bjart veður en stöku síðdegisskúrir á sunnanverðu landinu. Hiti 10 til 18 stig, hlýjast sunnan til.

Á miðvikudag:
Vestan og norðvestan 5-10 m/s. Víða bjartviðri en líkur á stöku síðdegisskúrum sunnan til á landinu. Hiti 10 til 17 stig.

Á fimmtudag:
Norðvestan 5-10 og bjartviðri sunnan- og vestanlands, en 8-13 og dálítil rigning um landið norðaustanvert. Hiti frá 7 stigum norðaustanlands, upp í 18 stig á Suðausturlandi.

Á föstudag:
Vestlæg átt 3-10 og skýjað vestanlands en léttir til um landið austanvert síðdegis. Hiti 10 til 17 stig, hlýjast á Suðausturlandi.

Á laugardag:
Suðvestan 5-10 og súld eða dálítil rigning á Suður- og Vesturlandi en bjart norðaustan- og austanlands. Hiti 10 til 19 stig, hlýjast á Austurlandi.

Á sunnudag og mánudag:
Suðlæg eða breytileg átt. Skýjað og lítilsháttar væta sunnan heiða en bjart með köflum á Norður- og Austurlandi með stöku skúrum síðdegis. Hiti 11 til 18 stig, hlýjast fyrir norðan og austan.

mbl.is