Þrjú aðildarfélög Kennarasambands Íslands, Félag leikskólakennara, Skólastjórafélag Íslands og Félag stjórnenda leikskóla skrifuðu undir nýja kjarasamninga við Samninganefnd Sambands íslenskra sveitafélaga í dag, föstudag. Þetta kemur í tilkynningu á vef Kennarasambands Íslands.
Í tilkynningunni kemur fram að Félag leikskólakennara skrifaði undir samning sem gildir til 31. desember 2021, en í samningnum er sérstök áhersla lögð á faglegt starf og undirbúning þess.
Félag stjórnenda leikskóla og Skólastjórafélag Íslands skrifuðu undir jafnlanga samninga, en fram kemur að samningarnir fela í sé samræmingu í kjaramálum félaganna og nýtt mat á starfsreynslu.
Að sögn KÍ verða samningarnir kynntir félagsmönnum aðildarfélaganna á næstu dögum, og atkvæðagreiðsla um gerð þeirra mun fara fram 5-7 ágúst næstkomandi.
Tvö önnur aðildarfélög KÍ, Félag grunnskólakennara og Félag kennara og stjórnenda í tónlistarskólum, munu taka upp kjaraviðræður að loknu sumarfríi.