Bíða niðurstöðu í einangrun á hálendinu

Norræna kom til landsins í morgun með 730 farþega. Hér …
Norræna kom til landsins í morgun með 730 farþega. Hér sést hún í höfn í Færeyjum. mbl.is/Sigurður Bogi

Tekið var á móti 730 farþegum er komu með Norrænu til Seyðisfjarðar í morgun. Einn um borð hafði greinst jákvæður af COVID-19 við sýnatöku í Hirtshals í Danmörku á þriðjudag. Fimm einstaklingar voru með honum í för á leið til Íslands og reyndust allir neikvæðir við sömu sýnatöku.

Þetta kemur fram í tilkynningu frá lögreglunni á Austurlandi.

Sexmenningarnir voru í einangrun um borð í Norrænu á leið hennar til landsins. Við komu tóku starfsmenn Heilbrigðisstofnunar Austurlands (HSA) á móti þeim og leiðbeindu um framhaldið sem og hvernig eigi að bera sig að hér á landi meðan frekari sýni eru rannsökuð.

Sýnataka bíður hins smitaða síðar í dag og fer þá fram greining á því hvort um gamalt smit er að ræða. Aðrar ráðstafanir varðandi einangrun bíður þeirrar niðurstöðu.

Ekki er talin hætta á að aðrir farþegar hafi orðið útsettir fyrir smiti.

Leið þeirra hingað til lands lá til starfa á hálendinu og munu þeir dvelja þar í vinnubúðum. Þar munu þeir sem fyrr segir í einangrun þar til niðurstöður frekari sýnatöku liggja fyrir.

mbl.is