Fyrirhugað er að byggja svokallaðan „vetrargarð“ efst í Seljahverfi í Breiðholti þar sem hægt væri að skipuleggja alls kyns íþróttamót og aðra viðburði, allan ársins hring. Þetta kemur fram í tilkynningu hverfisskipulags Reykjavíkur til fjölmiðla, sem mbl.is greindi frá í gær.
Í tillögum segir að hverfisskipulag borgarinnar fyrirhugi að í vetrargarðinum yrðu „fjölbreyttar brekkur og ævintýraþrautir sem yrðu formaðar sérstaklega á svæðinu“. Svæðið geti nýst bæði einstaklingum og hópum sem og fyrirtækjum og stofnunum til viðburðahalds.
Í tilkynningu til fjölmiðla í gær kynnti hverfisskipulag Reykjavíkurborgar tillögur sínar til uppbyggingar í Breiðholti. Þar geti á næstu árum risið þrjú þúsund nýjar smáíbúðir, stúdentagarðar, verslunar- og þjónustukjarnar og leikskóli. Ævar Harðarson, deildarstjóri hverfisskipulags Reykjavíkurborgar, sagði í samtali við mbl.is í gær að kostnaður við verkefnið yrði ekki mikill. „Þetta eru svo auðvitað bara tillögur, verkefnið verður kynnt betur síðar eftir samráð við íbúa.“
Fyrirhugaðar eru skipulagsbreytingar á reitum við Eddufell og Völvufell. Til stendur að eldri byggingar víki fyrir nýju húsnæði sem hýsa mun stúdentagarða, sameiginlegan leikskóla hverfisins og ný raðhús.
Í tillögum hverfisskipulags Reykjavíkurborgar er einnig kveðið á um byggingu matjurtagarða og gróðurhúsa víða í Breiðholti. Þau svæði sem um ræðir eru opið svæði sunnan við Stekkjarbakka, norðan við sérbýlishúsabyggðina í Stekkjum og loks á opnu svæði við Jaðarsel, austan við leikskólann Jöklaborg.
Telur hverfisskipulag Reykjavíkurborgar að þetta muni hvetja til útiveru og neyslu á hollri fæðu sem og betri landnýtingu á opnum svæðum.
Vefsíðu verkefnisins má finna hér.