Þröstur Jón Sigurðsson, eigandi Sporthússins, hefur ákveðið að loka líkamsræktarstöðinni tímabundið.
Þröstur greindi frá þessu á heimasíðu Sporthússins fyrr í dag.
„Mikil og almenn óánægja er í samfélaginu yfir því að Sporthúsið skuli hafa nýtt þá heimild sem kveðið er á um í reglugerð heilbrigðisráðherra og opnað fyrir hóptíma, en ekki farið að tilmælum sóttvarnalæknis, þrátt fyrir að í minnisblaði hans til ráðherra hafi verið lagt til að tilteknar íþróttir gætu hafið starf með takmörkunum, svo sem CrossFit og jóga. Í ljósi þessa tel ég að ekki hafi verið rétt að svo stöddu að opna Sporthúsið, CrossFit, BootCamp, SuperForm og aðra starfsemi hjá okkur sem kennd er í hópum,“ segir Þröstur.
„Vegna skilaboða sóttvarnalæknis gegnum fjölmiðla og þeirrar miklu sundrungar sem virðist vera í samfélaginu vegna opnunar líkamsræktarstöðva hef ég ákveðið að axla ábyrgð og loka starfsemi okkar aftur, í von um að það sé rétt ákvörðun fyrir almannahag,“ segir Þröstur, sem biðst jafnfram afsökunar á þeim óþægindum sem lokunin kann að valda.
Þá bendir Þröstur einnig á að eftir hans bestu vitund hafi ekkert kórónuveirusmit verið rakið til Sporthússins.
„Mig langar að lokum að benda á það að þrátt fyrir gríðarlegan fjölda heimsókna í Sporthúsið (um 1 milljón heimsókna), frá því að Covid-19 hófst, þá hefur eftir minni bestu vitund ekkert smit verið rakið til okkar. Öll umræða um líkamsræktarstöðvar sem gróðrarstíu Covid-19 á því að mínu mati ekki við um okkar starfsemi, enda höfum við og viðskiptavinir okkar lagt gríðarlega hart að okkur við að gæta að ýtrustu sóttvörnum,“ segir Þröstur.