Sex hundar drápust í eldsvoðanum sem varð á neðri hæð íbúðarhúss í Arakór í Kópavogi í gær. Fjórir til viðbótar voru fluttir til aðhlynningar á dýraspítala.
Aðspurður segist Heimir Ríkharðsson, lögreglufulltrúi hjá lögreglunni á höfuðborgarsvæðinu, ekki hafa upplýsingar um líðan hundanna fjögurra. Líklegt er að hinir hundarnir sex hafi drepist úr reykeitrun. Hundaræktun hefur verið starfrækt í íbúðinni.
Það voru íbúar á efri hæð hússins sem urðu varir við mikinn reyk í gær en enginn var heima niðri. Slökkviliðið var í kjölfarið sent á staðinn.
Að sögn Heimis er tæknideild lögreglunnar að vinna í því að rannsaka eldsupptök en ekkert er ljóst um þau að svo stöddu.
Uppfært kl. 12.55
Í tilkynningu frá lögreglunni kemur fram að talið er eldurinn hafi kviknað út frá rafmagnstæki.