Innlent | mbl | 30.11.2020 | 23:55

Nokkur minni háttar útköll vegna veðurs

Björgunarsveitir hafa verið kallaðar út í minni háttar verkefni í kvöld. Ljósmynd/Eggert Jóhannesson

Nokkur minniháttar útköll hafa verið í dag hjá björgunarsveitum landsins vegna veðurs.

Björgunarsveitir hafa verið kallaðar út alla vega tvisvar í dag til að sinna minni háttar verkefnum sem tengjast óveðri dagsins.

Þakplötur losnuðu á þaki húss suður með sjó í Vogum á Vatnsleysuströnd. Þá lenti bíll í vandræðum vegna veðurs vestur á fjörðum.

Að öðru leyti hefur dagurinn og kvöldið verið rólegt hjá viðbragðsaðilum.

Samkvæmt Vegagerðinni er vetrarfærð víða um land.

Yfirlit: Vetrarfærð er á landinu, hálka, hálkublettir eða snjóþekja. Versnandi veður er á Suðvesturlandi, Vesturlandi og á Vestfjörðum. #færðin
— Vegagerðin | Iceland Roads (@Vegagerdin) November 30, 2020

Suðvesturland: Það er stórhríð á Sandskeiði og Hellisheiði og snjóþekja og skafrenningur í Þrengslum og á Mosfellsheiði. Á öðrum leiðum eru hálkublettir eða hálka en flughálka er á Kjósarskarði. Þungfært er á Krýsuvíkurvegi. Það er hvasst á Reykjanesi og á Kjalarnesi.#færðin
— Vegagerðin | Iceland Roads (@Vegagerdin) November 30, 2020