Margir gætu bæst í 100 ára klúbbinn 2021

Í júlí á þessu ári voru í fyrsta sinn á lífi 60 Íslendingar hundrað ára og eldri. Nú í árslok er fjöldinn kominn niður í 46, karlarnir eru 7 og konurnar eru 39. Þetta kemur fram á fésbókarsíðu um langlífi, sem Jónas Ragnarsson ritstjóri hefur umsjón með.

Á næsta ári geta 29 bæst við, fæddir 1921. Síðan koma mjög sterkir árgangar, fæddir frá 1922 til 1925, og þá munu tölurnar fara hækkandi á ný. Hagstofan hefur spáð því að árið 2026 verði hundrað ára og eldri orðnir um 100, segir Jónas.

Sérstaka athygli veki að nú séu rúmlega sextíu á lífi fæddir 1922 og eru því 98 ára. Síðustu ár hefur sambærilegur fjöldi verið um fjörutíu. Karlar eru um 40% af þessum hópi en hafa áður verið 20-30%, að því er fram kemur í Morgunblaðinu í dag.