Skíði, söngur og rafræn sæla

Sæluviku Skagfirðinga lýkur um helgina en vegna kórónuveirunnar hefur dagskráin verið með óhefðbundnu sniði. Mikið hefur verið um rafrænar sýningar, tónleika og sjónvarpsþætti sem hægt hefur verið að nálgast á síðunni saeluvika.is.

Uppfærslur með Leikfélagi Sauðárkróks og nemendafélögum Árskóla og Fjölbrautaskólans á Sauðárkróki hafa m.a. verið sýndar á netinu; leikrit og söngleikir, að því er fram kemur í Morgunblaðinu í dag.

Nokkrir viðburðir hafa verið í raunheimum, m.a. sýning á Héraðsskjalasafninu um héraðsfréttablaðið Feyki í 40 ár og myndlistarsýning hefur verið í Gúttó á verkum skagfirskra myndlistarmanna. Opið hús verður á Byggðasafninu í Glaumbæ í dag frá kl. 10 til 16. Í kvöld verður sumarball fyrir 5.-7.bekk í Húsi frítímans og á morgun verða tvennir tónleikar í Gránu, „Skagfirskir tónar“, með lögum og textum sem konur úr Skagafirði hafa samið. Á morgun verður tilkynnt hver hlýtur Samfélagsverðlaun Skagafjarðar 2021 og úrslit í vísnakeppni Feykis og Safnahússins einnig kynnt.