Deildarmyrkvi núna en almyrkvi eftir 5 ár

Deildarmyrkvinn líkt og hann mun líta út í Reykjavík 10. …
Deildarmyrkvinn líkt og hann mun líta út í Reykjavík 10. júní kl. 10:17. Þá skyggir tungl á 69% af þvermáli sólar og veldur 61% myrkvun. (Breytt ljósmynd: Veðurstofan/Þórður Arason

Deildarmyrkvi á sólu mun sjást á Íslandi á morgun, fimmtudag. Í deildarmyrkva fer tunglið fyrir hluta sólarinnar, en ekki verður almyrkvi. 

Í Reykjavík hefst myrkvinn kl. 09:06 og lýkur kl. 11:33. Hann verður mestur kl. 10:17, en þá skyggir tungl á 69% af þvermáli sólar og veldur 61% myrkvun. Mesta myrkvun á Íslandi verður breytileg eftir landsvæðum, 56-65% og tímasetningu getur skeikað um nokkrar mínútur frá Reykjavík. Skýjafar og veður hafa mikil áhrif á hversu vel myrkvinn sést að því er segir á vef Veðurstofu Íslands.

Rigningu spáð og litlu skyggni

„Þetta verður mesti sólmyrkvi á Íslandi frá því fyrir sex árum, 20. mars 2015, en þá varð 98% myrkvun í Reykjavík og yfir 99% á Austfjörðum, en þá sást almyrkvi á Svalbarða og í Færeyjum,“ segir Þórður Arason, sérfræðingur á Veðurstofu Íslands, í frétt á vef Veðurstofunnar.

„Því miður lítur ekki vel út með veðrið á fimmtudaginn og stefnir í rigningu víða um land, en þó er ekki útilokað að það rofi til smástund einhvers staðar,“ segir Þórður og minnir á að til að vernda augun er nauðsynlegt að hafa sérstök gleraugu við að skoða sólmyrkva.

Þessi myrkvi mun hvergi sjást á jörðinni sem almyrkvi en mun koma fram sem hringmyrkvi við sólarupprás í Ontario í Kanada, færist svo hratt í norður, yfir norðurhluta Grænlands og endar í Síberíu. Við hringmyrkva er tunglið of langt frá jörðu til að hylja alla sólina og sólin nær að skína hringinn í kringum tunglið.

Eftir fimm ár, 12. ágúst 2026, um kl. 17:45, verður fyrsti almyrkvi á sólu á Íslandi síðan 1954, og sá þrettándi frá landnámi. Almyrkvinn mun sjást á öllu vestanverðu landinu og mun vara í 1 mín. í Reykjavík en lengst 2 mín. 13 s á Bjargtöngum. Almyrkvi á sólu sást síðast í Reykjavík árið 1433.

mbl.is