Þokkalegar horfur eru á höfuðborgarsvæðinu fyrir þjóðhátíðardaginn 17. júní samkvæmt veðurfræðingi hjá Veðurstofu Íslands. Útlit er fyrir fremur svalt veður og vætu um allt land.
„Horfur á höfuðborgarsvæðinu eru þokkalegar, útlit er fyrir fremur hæga norðlæga átt á landinu og einhverja skúri, einkum á Norður- og Suðausturlandi,“ segir Eiríkur Örn Jóhannsson veðurfræðingur. Þá segir hann að væta verði á landinu, en minna á Vesturhluta landsins.
Eiríkur segir svalt á landinu, en hámarkshiti nær 4-10 gráðum eftir landshlutum, skýjað verður að mestu en ekki hvasst.
Þá hefur verið gefið út að hátíðarhöld í Reykjavík á 17. júní í ár verði með svipuðu sniði og á síðasta ári vegna samkomutakmarkana. Borgarbúar eru hins vegar hvattir til þess að halda upp á daginn með vinum og fjölskyldu.
Morgunathöfn verður í beinni útsendingu á RÚV frá Austurvelli. Athöfnin er hefðbundin, Katrín Jakobsdóttir forsætisráðherra mun flytja ávarp og fjallkonan frumflytur sérsamið ljóð við tilefnið.