Brennslustöð í stað urðunar

Sorpsamlögin fjögur á Suðvesturlandi hafa ákveðið að hefja undirbúning að innleiðingu nýrrar framtíðarlausnar til meðhöndlunar á brennanlegum úrgangi í stað þess að urða hann.

Felst verkefnið í að undirbyggja ákvarðanir um tæknilausnir, staðarval og kostnað og á niðurstaða í því að liggja fyrir innan fjögurra mánaða.

Samkvæmt lögum þarf að draga mikið úr urðun sorps hér á landi, eins og annars staðar. Liður í breytingunni er bygging Sorpu á gas- og jarðgerðarstöðinni „Gaja“. „Næsta stóra verkefnið er að afsetja brennanlegan úrgang,“ segir Líf Magneudóttir, formaður stjórnar Sorpu. Hún segir að sorpsamlögin fjögur hafi með þessu tekið höndum saman við að innleiða hringrásarhagkerfið.

Sorpsamlögin eru, auk Sorpu, Kalka á Suðurnesjum, Sorpurðun Vesturlands og Sorpstöð Suðurlands. Umhverfisráðuneytið stendur að vinnunni með þeim og verður einnig horft til lausna fyrir allt landið, að því er fram kemur í Morgunblaðinu í dag.