Fimmtán manns dvelja nú á nýja farsóttarhúsinu sem opnaði í gær, þar sem Fosshótel Baron er til húsa. Gylfi Þór Þorsteinsson, umsjónarmaður farsóttarhúsa, býst við því að gestum muni fjölga umtalsvert með deginum. 145 eru samtals í einangrun í farsóttarhúsunum þremur.
Gylfi bendir á að til viðbótar séu 180 í skimunarsóttkví. „Við þá tölu mun bætast töluvert í dag miðað við þennan fjölda farþegavéla,“ segir Gylfi og á þá við þær 53 flugvélar sem áætlað er að komi til landsins í dag, samkvæmt vef Isavia. „Við vitum samt ekkert fyrr en fólkið bara birtist.“
Gylfi segist fylgjast með því hve margar vélar koma á hverjum degi og áætla út frá því hve marga starfsmenn þurfi að kalla til og hve mikinn mat þurfi að panta. Að undanförnu hefur farsóttarhúsið tekið á móti 60 til 80 manns á hverjum degi sem koma með flugi. Þá komi einnig um 15 til 20 sýktir einstaklingar.
Stór hluti stúdenta úr Flensborgarskólanum sem komu heim úr útskriftarferð sinni til Krítar í gær dvelur nú í farsóttarhúsunum en 30 þeirra eru smituð af Covid.
Þeir sem dvelja í farsóttahúsunum eru fáir alvarlega veikir, en Gylfi segir nokkra gesti þó vera með töluverð einkenni. Einkennin koma vanalega fram í lok fyrstu eða byrjun seinni viku einangrunar, en stór hluti gestanna er að byrja sína fyrstu viku. „Þessir einstaklingar eru bólusettir og einkennin geta verið alvarleg,“ segir Gylfi.